Жаңа университет – жаңа мүмкіндік: Ұлытаудың индустриялық-экономикалық әлеуетін арттыру қадамы

Қазақстанда өңірлік экономиканы әртараптандыру және жоғары білікті кадрлар даярлау арқылы өнеркәсіптік әлеуетті арттыру бағытында маңызды қадам жасалды. ҚР Ғылым және жоғары білім министрлігі мен «Қазақмыс корпорациясы» ЖШС өзара ынтымақтастық туралы Меморандумға қол қойып, оның негізінде Ұлытау облысында жаңа инновациялық жоғары оқу орны – Ұлытау инновациялық университетін құру жоспарланып отыр.

Бұл бастама өңірдің тау-кен өнеркәсібіне қажетті заманауи мамандар даярлау арқылы экономикалық өсуді жеделдетуге, өндірістің тиімділігін арттыруға және жаңа технологияларды енгізуге мүмкіндік береді. Министр Саясат Нұрбек пен «Қазақмыс» корпорациясының Басқарма төрағасы Нұрахмет Нуриев қол қойған меморандум жоғары білім беру жүйесі мен өнеркәсіп арасындағы интеграцияны нығайтып, өңірдің әлеуметтік-экономикалық дамуына тікелей үлес қосуды көздейді.

Жаңа университеттің ашылуы өңірде білікті кадрлар тапшылығын азайтып қана қоймай, инвестиция тарту, инновациялық жобаларды дамыту және кәсіпорындардың бәсекеге қабілеттілігін арттыру арқылы Ұлытау облысының экономикалық дамуына серпін береді.